ကျွန်မမှာ မကောင်းတဲ့ အကျင့်ပေါင်းများစွာရှိပါတယ်...
သူများကို စိတ်အနှောင့်ယှက်ဖြစ်စေတဲ့အကျင့်.. ကိုယ်ကိုယ်တိုင်အတွက်တောင် မကောင်းတဲ့ အကျင့်.. စုံပါတယ်..
များလွန်းလို့ ဘယ်ကစရမှန်းတောင် စဉ်းစားမရနိုင်ဘူး..
အခုကတော့.. ဖြစ်သလို မစားတတ်တဲ့ အကျင့်ပေါ့.. အစားအစာနဲ့ ပတ်သက်လာရင် အရမ်းကို စန်းစန်းတင့်ပါတယ်...
စန်းစန်းတင့် ဂျီးများလွန်းလို့ .. ဟိုဟာမစား ဒီဟာမစား ဆိုပေမဲ့ ပိန်လှီမနေတာတော့ အတော်ခက်တာပဲ..
ကျားကိုးစီး စားမကုန်တဲ့ ကိုယ်ခန္ဒာကို ပိုင်ဆိုင်ထားတာပါ..
ကိုယ့်ဟာကိုယ်တော့ ဒီလိုပဲနေရင်းနဲ့ သိပ်မသိပါဘူး.. ချစ်သူရလာတော့ချစ်သူရဲ့ ဝေဖန်ချက်တွေက တဆင့်ကိုယ့်ဟာကိုယ် ပြန်သိလာရတာ.. ဘေးကကြည့်နေသူက ပိုမြင်တာကိုး..
သူများတွေလို ၀က်သားမကြိုက်လို့ ၀က်သားမစားဘူးဆိုတာမျိုး မဟုတ်ဘဲ.. ၀က်သားကို အနှစ်နဲ့ ချက်ရင် မစားချင်တာတို့... ဒုတ်ထိုးဆိုရင်တော့ ဗန်းပါစားချင်တာတို့... ၀က်သား အဆီကို ပြုတ်ကြော်ထဲ ပါလာရင် အသားချည်းပဲ ဖဲ့စားတတ်ပြီး.. ၀က်ခေါက်ကင်တို့ ၀က်ခေါင်းသုပ်တို့ကျ မက်မက်စက်စက်ဖြစ်ပြန်ရော...
အဲ့ဒါ ဂျီးများတာ.. လူဆိုတာ ဆာရင်တော့ အကုန်စားမှာဘဲ .. မငတ်ဖူးသေးလို့.. ဆိုတဲ့စကား ချစ်သူက ခဏခဏပြောပါတယ်.. ဟုတ်မလားတော့ မသိဘူး... ဖြစ်သလို စားတတ်ရမှာပေါ့ဆိုတဲ့ ချစ်သူရဲ့စကားကို.. ကျွန်မက တသက်လုံး ဖြစ်သလို မစားဖူးဘူး ဆိုပြီး ပြန် ပက်တတ်တဲ့သူမျိုးပါ..
တကယ်လည်း မစားခဲ့ဖူးပါဘူး.. မရရအောင် ကြိုက်တဲ့ဟာကို ရှာကြံစားပါတယ်.. တခြားမြို့ တမြို့မှာ ဘော်ဒါသွားနေတုန်းက အစားအသောက်အတွက်နဲ့ အတော် ဒုက္ခရောက်ခဲ့တာပါ..
ဘော်ဒါမှာ အဖေထားခဲ့တုန်းကလည်း မငိုဘူး.. အေးအေးဆေးဆေးပဲ.. ထမင်းစားပွဲရောက်မှ ငိုရကောင်းမှန်းသိတော့တယ်.. ထမင်းကလည်း ဘာလိုကြီးမှန်းမသိ.. ဟင်းကလည်း စားကောင်းမဲ့ပုံ မပေါ်တဲ့ အပြင် ၂တုံး၃တုံးလောက်ပေးထားတာ.. ဘိုလုပ်ရမှန်းကို မသိတာ.. အဲ့ဒါနဲ့ ထိုင်ငိုတော့တာပဲ..
အဆောင်က ဆရာမတွေကတော့ ထမင်းကျွေးဖို့က သူတို့ တာဝန်ကိုး.. မစားမချင်းမထနဲ့ပေါ့.. ဘယ်ရမလဲ.. ဟုတ်ကဲ့.. မထပါဘူး.. ထိုင်ငိုနေတာ မထခိုင်း မချင်း.. နောက်ဆုံးတော့ သူတို့လည်း မတတ်နိုင်ပါဘူး.. မစားတာကို အတင်းခွံ့ရအောင် ကလေးသူငယ်အရွယ်လည်း မဟုတ်တော့.. ကျောင်းသွားခါနီး အချိန်ရောက်တော့ ထခိုင်းရတာပဲ.. ကဲ .. ထမင်း မစားချင်လည်း ကိုယ့်မှာ ရှိတဲ့မုန့်လေးတော့ ဗိုက်ဝအောင်စားသွားဆိုပြီး ချော့မော့ပြောဆိုပြီး လွှတ်လိုက်ရတာပေါ့..
အဲ့လို အစတည်းကဖြစ်ထားတော့ နောက်ပိုင်း ဆရာမတွေက သိပ်မပြောတော့ဘူး.. ကိုယ်လည်း ကိုယ့်ဟာကိုယ် မုန့်လေးစားလိုက် ခေါက်ဆွဲလေး ကြာဇံလေးပြုတ်လိုက်စားခဲ့တာ.. သိပ်မကြာဘူး.. အဲ့လို အကြောင်းတွေ အိမ်ကိုပြန်ပြောတော့ မနေနိုင်တဲ့ မိဘတွေကပဲ ကျွန်မစားဖို့ ဟင်းတွေ အမြန်ချောတို့ ကားဂိတ်တို့ကနေ ပို့ပေးရတယ်.. အဲ့တုန်းက ပြင်ဦးလွင်ကို တိုက်ရိုက် အိတ်စပရက်တွေမရှိပါဘူး.. မန္တလေးကနေတဆင့် လာရတာပါ.. အဲ့ဒီ့ပို့လာတဲ့ အိမ်က ဟင်းတွေ အခြောက်အခြမ်းတွေနဲ့က လွဲရင် ထမင်းမစားပါဘူး.. ကြားထဲမှာ ၁ရက် ၂ရက် ပြတ်လတ်သွားတာကလွဲရင် အိမ်ကနေ ကျောင်း စာသင်နှစ် ၂ နှစ်ပတ်လုံး မပြတ်ပို့ပေးနေခဲ့ရတယ်.. အဲ့တာက တသက်မှာ ကြုံဖူးသမျှထဲက အကြီးဆုံး အငတ်ဘေးပါ.. ပေါင် ၃၀-၄၀ လောက် ကျသွားခဲ့တာပါ.. အဲ့ထက်လည်း တခါမှ ဒုက္ခမခံဖူးပါ..
အခုလည်း အိမ်မှာ ဟင်းချက်တဲ့သူရှိရင် အမေက အိမ်မှာ ဟင်း ၂ မျိုး ၃ မျိုး စီစဉ်ပြီး ချက်ခိုင်းပါတယ်.. အနှစ်ဟင်းဆိုရင် ဂျီးများတတ်တဲ့ ကျမအတွက် အနှစ်ဟင်းချက်မဲ့ နေ့ဆို.. တခြားအခြောက်အခြမ်း တခုခု အမြဲတမ်းရှိပါတယ်.. လူမရှိလို့ အမေကိုယ်တိုင်ချက်ရမယ်ဆိုလည်း ကျမစားမဲ့ဟင်းမျိုးကို သာ ရွေးချက်တာ များပါတယ်.. လူမရှိတော့ အလွယ်ချက်တဲ့ ဟင်းတွေက ကျမစားနိုင်တာတွေပဲ ဖြစ်နေတာလည်း ဖြစ်နိုင်ပါတယ်.. အဲ့လိုမှ မဟုတ်ဘူး.. ဘယ်သူ ချက်ထားတဲ့ ဟင်းပဲဖြစ်ဖြစ်... ကျမ မကြိုက်လောက်ဘူးဆို... အိမ်ပြန်ရောက်တာနဲ့ အမေက.. ဘာဟင်း ဘာဟင်းတော့ ချက်ထားတယ်... မကြိုက်ရင်လည်း တခုခုမှာစားလိုက်ဆိုပြီး အမြဲပြောတတ်တယ်.. အိမ်နားမှာက ဆိုင်တွေကလည်း ဖုန်းဆက်မှာရင် လာပို့တာကိုး... အဲ့လိုဆိုတော့ သူများအိမ်ရောက်ရင် တော်ရုံတန်ရုံ ချက်ထားတဲ့ ဟင်းနဲ့မစားတတ်ဘူး.. အဲ့မှာ ချစ်သူနဲ့ ပြသနာ စတက်တာပဲ..
အမှန်မှာ ဒီစာရဲ့ အကြောင်းရင်း အစပေါ်လာပုံက အခုမှလာတာပါ...
တရက်.. ချစ်သူက ရုံးသွားရင် အဆင်သင့်စားရအောင် ပေါင်မုန့်ထောပတ်သုတ်လေး လုပ်ပေးပါတယ်.. လမ်းရောက်မှ စားတာဆိုတော့ ကားပေါ်မှာ ပြသနာစပါတယ်.. ပေါင်မုန့်သုတ်နေတုန်းကတော့ တချက်လှမ်းမြင်လိုက်တယ်.. ဘေးနားတွေကို နှံအောင်မသုတ်လို့... (ပြောစရာကျန်သွားမှာစိုးလို့.. ဒီနေရာမှာ ပြောတာ ဘေးနားနော်.. ဘေးသားတွေကလုံးဝမစားလို့.. ချစ်သူက အဲ့ဒါကို ကြည့်မရတဲ့ ကြားထဲက ဖယ်ထားပေးပြီးသား) ဒါနဲ့ ပွစိပွစိ အနဲငယ်လုပ်ပြီး ကားပေါ်ရောက်တော့ စစားပါတယ်... ကိုက်လိုက်တဲ့ အချိန်မှာပဲ ပေါင်မုန့်သားချည်းပဲ စားရတဲ့ အရသာကို ရတယ်.. ချစ်သူကတော့ ပိုတယ်ပြောပါတယ်.. အဲ့ကစပြီး ပြသနာရှာပါတယ်.. ဒီလိုမစားတတ်မှန်းသိရက်နဲ့ ထောပတ်နဲနဲပဲ သုတ်တယ်ပေါ့.. ချစ်သူကလည်း စေတနာပေါ့.. ဒီလောက်ဝနေတာကို နဲနဲဖြစ်ဖြစ်လျှော့စားပေါ့... ကျမကလည်း.. မစားရရင် အငတ်နေလိုက်မယ်.. ဒီလို မကောင်းတဲ့ဟာကိုတော့ လုံးဝမစားချင်ဘူးလို့ ဇွတ်ပြော.. ချစ်သူက အဲ့ချိန်ထိကောင်းကောင်းမွန်မွန်နဲ့ .. လိမ္မာပါတယ်.. ဒီနေ့စားလိုက်.. နောက်နေ့ကျ ကောင်းကောင်းသုတ်ပေးမယ်ပြော.. အဲ့ဒါကို မယုံဘူး...ရှင်ထပ်လုပ်ဦးမှာပဲ.. ဘာမှန်းလဲမသိဘူး.. သိရဲ့သားနဲ့ကို တမင်လုပ်တာ.. ဘာညာသရကာ.. !@!#@!$!$!$@!$$%$^%$&... အဲ့မှာ ချစ်သူက နင့်ကို စကားကိုမပြောချင်တော့လို့ဆိုကာ စူပုပ်နေသောရုပ်နဲ့ ရုံးရောက်လေသတည်းပေါ့.. ဒါက မကောင်းသော အကျင့်များထဲက တခုပေါ့... မကောင်းမှန်းတော့ သိတယ်.. ပြင်ဖို့လည်း စိတ်ကူးမရှိသလို.. ပြင်လည်း မပြင်ချင်ပါ....... ကြုံရင်တော့ မကောင်းသောအကျင့်များ အကြောင်း လူအမြင်ကပ်စရာ.. ဆက်ပါဦးမည်..
No comments:
Post a Comment